Me Tīmata

Te Pātere (Me Tīmata)

Me tīmata ia Ngātoroirangi i pikitia ake ai i te tihi o Tongariro
Ka kinongia tana kiri i te mātao
Ka aue atu rā ki ōna tuahine, Kia haria mai te ahi, i te wā kainga
Kia ngata rā te hiahia, ka hāruru mai te whenua te Ao te whenua Po
Ka tatū mai ki tana taha
Mahue atu ia rāua te wera me te ahi i te tahatā
Ka mātatoru, ka māraratia
Noho iho rā te mamāoa ki te Whakarewarewa
Te Tūnga o te ope taua a Wāhiao e!

Ka tīī waewae ahau ki runga i a Te Pākira
Kia mārama te titiro, Ki Whakatūtū i mate ai a
Kurungaituku ia Hatupatu
Kia kite au a Roto-ā-Tamaheke, te rerenga waikaukau o ngā tūpuna mātua
Me huri whakarunga ki Papawharanui, kia toro taku ringa ki Parekōhuru
Te ōhākitanga o te iwi e!

Kia hīkoi au ki Korotiotio
kei tua mai, ko e Waro-ā-Ngāwai, kei kō atu, ko Te Wai-o-nihotahi,
Kia peke atu, ki roto o Puārenga
Kia rere i te tai, me mihi atu ra, Ki Ngā Mōkai-ā-kōkō
E kōhuahua rā, Ko Te Mitimiti, Ko Waikōrua, Ko Parengātata, Ko Tūtaepoko

Mē hoki au ki te awa
Kei kō mai, ko Waihuka, ko Tikōrangi
I wera mai te moana i ā te korokoro, Ko te hoa ko Kererū
Ko te wai ōranga o rātau, ko Waikorohīhī, Ko Te Māhanga, Ko Kōmutumutu
Ka heke ai te roke ko waiparu, kia whiti atu ki Puapua
E tū whakahirahira mai ra ko Pōhutu, te whakamīharotanga o te Ao

E pōhiri mai ko Papakura
Kei waenganui, ko Te Puke ā Ruahine
Noho tonu ra, ko Purapurawhetū, ko Ngāraratuatara, kia tīkarokaro atu ra
E tū ana au i te take o Pohaturoa, ka rongo ia Te Kūmete, Ko te nōhanga tērā o Tūohonoa,
Kia tipi atu au ki te tūranga o Te Tuku-tuku, me whakatata ki te ana o Tukīterangi

Ka titiro whakararo ki te anarata te pātaka o te Whakangehe
Kia tūpato, kei pahū Waikite
Aue ra ko Te Rangianiwaniwa, te mahuetanga o ngā puna tawhito,
i waihanga iho ra e Tarawera

Ka tūmeke tonu au
Ki te kiri, ki te mīmi ki Te Wai o Parewhārangi
Kia whakatā mai au, Ki Rotokānapanapa, Kia puhia te kanohi i te hau
Me hoki au ki te pā o Te Puia
Ka whakarongo aku taringa ki te tangi o Rotowhio

Te okiokinga o te tini me te mano
Tīī ana mai, ko Te Aronui ā Rua
Takoto iho rā ko Te Arawai, hei tohu, mo te rau tau o Rotorua
Te moana tērā, i kauhia iho ra, e Hinemoa
Te uri o te ara kāwai o Tuhoūrangi
E kōkōia e ara e…

Nā Mauriora Kingi i Tito